ನಿನ್ನೊಂದಿಗೆ ಕಡಲ ದಡದಿ

ಎಂದೂ ಕಾಣದ ಹರುಷವ ನೀಡಿದೆ ನೀನಿಂದು

ಸ್ವರ್ಗಕ್ಕೆ ಕಿಚ್ಚು ಹಚ್ಚುವಂತೆ...

ಸಂತಸದಿ ಬಾಳುವ ಚಿಗುರಾಸೆಯು

ಮೂಡಿದೆ ನಿನ್ನೊಂದಿಗೆ ಈ ಮನಕೆ ಇಂದು

ನನ್ನ ಪ್ರತಿ ಕಣ ಕಣದಲ್ಲೂ

ನಿನ್ನದೆ ಪ್ರತಿಫಲನದ ಸಂಭ್ರಮ

ಬರೆದಿರುವೆ ಪ್ರೇಮ ಗೀತೆ

ನನ್ನ ನೆತ್ತರವನುಕ್ಕಿಸಿ ನಿನಗೋಸ್ಕರ

ಮುಸ್ಸಂಜೆ ವೇಳೆ ಕಡಲ ತೀರದಿ

ಮೊದಲ ಹೆಜ್ಜೆಯು ನೀರು ಇಂಗಿದ ಮರಳಲಿ

ನಿನ್ನ ಹೆಜ್ಜೆಯ ಮೇಲೆ ನನ್ನ ಹೆಜ್ಜೆಯಿಡುತ

ಅನುಮತಿ ಸಮ್ಮತಿಗಳಿಲ್ಲದೆ ಕೂಡಿಕೊಂಡಿವೆ ಕಿರುಬೆರಳುಗಳು

ಮುಂದೆ ಸಾಗಿದಂತೆ ಬಿಗಿದಪ್ಪಿವೆ ಇಬ್ಬರ ಅಂಗೈಗಳು

ನಿನ್ನ ತುಂಟ ನಗುವ ನೋಡಿ

ಮೈ ಮರೆಯುವಾಸೆ ಇನ್ನೂ ಜೀವಂತ

ಜಗವೆಲ್ಲ ಸ್ಥಬ್ಧಗೊಂಡು

ಚರಾಚರಗಳ ಚಿತ್ತ ನಮ್ಮ ಮೇಲಿರಲು

ಹೊಟ್ಟೆ ಕಿಚ್ಚಿಗೆ ಸೂರ್ಯನ ಜಲಸಮಾಧಿ

ಮತ್ತೊಂದೆಡೆ ಹುಣ್ಣಿಮೆಯ ಚಂದಿರನ ಬಾಹ್ಯ ಬೆಂಬಲ

ತಾರೆಗಳ ಮಿಣುಕು ನೋಟವು

ಬೆಳದಿಂಗಳ ಕರಗಿ ಕಡಲ ಸೇರಲು

ಇಬ್ಬರ ಕಣ್ಣ ನೋಟ ಒಂದಾಗಲು

ನಿನ್ನ ಬೆನ್ನು ನಾಚಿ, ತಲೆಯೂರಲು

ನಿಂತಲ್ಲೆ ನನ್ನೆದೆಯ ಮೇಲೆ...

ಎದೆಯ ಬಡಿತದ ಶಬ್ದಕೆ ಬೆದರಿ

ನಿನ್ನ ಬೆಚ್ಚನೆಯ ಆಲಿಂಗನ

ಸುತ್ತಲಿನ ಪ್ರೇಕ್ಷಕರು ಬರೀ ಮೌನ!