ಚೂರು ಕಲ್ಪನೆ ಚೂರು ಚಿಂತನೆಯಲಿ ಮುಳುಗಿರಲು ನಾನು
ಒಂದು ಒಂಟಿ ಕೊಠಡಿಯೊಳಗೆ,
ಕೊಠಡಿಯ ಒಂಟಿತನಕ್ಕೆ ನನ್ನ ಸಾಥ್,
ನನ್ನ ಒಂಟಿತನಕ್ಕೆ ಆ ನಾಲ್ಕು ಗೋಡೆಗಳ ಮೇಲೆ
ಹಳೇ ನೆನಪುಗಳ ಸಾಥ್,
ಆ ಚಿಂತೆ – ಕಲ್ಪನೆಗಳಲಿ ಮೈ ಮರೆತಾಗ ಯಾರೋ ಕೂಗಿದ ಭಾಸ,
ಆಲಿಸಿದಾಗ ಸರಿಯಾಗಿ ಟಿಕ್ – ಟಿಕ್ ಗಡಿಯಾರದ ನಿನಾದ.....
ಕೇಳಿದೆ ನಾ ಸಮಯಮುಖಿಯನ್ನು
ನಿಂದೇನು ಗೋಳು ನಮ್ಮ ಗೋಳಿನ ಮದ್ಯೆ,
ಗುಡುಗಿತದು, ನನಗೇಕೆ ಮಾಡದ ತಪ್ಪಿಗೆ
ಜೀವನಪೂರ್ತಿ ಒಂಟಿಯಾಗಿ ಜೋತು ಬೀಳುವ ಶಿಕ್ಷೆ,
ಹಗಲು – ರಾತ್ರಿ ನಮ್ಮ ಚಲನೆಯೇ ನಿಮಗೆ ಪ್ರೇರಣೆ
ನಿಮ್ಮ ಹಗಲು ಹಾರಾಟಕ್ಕೆ,
ಮರಳಿ ಗೂಡಿಗೆ ಬಂದಾಗ
ಮತ್ತೆ ಕತ್ತಲು ಕಾರ್ಯಾಚರಣೆಗೆ.....!
ಮತ್ತೆಂದಿತದು, ನೀ ಹೊಡೆದ ಮೊಳೆಯನ್ನು
ಹಿಡಿದು ನೇತಾಡಿ ಜೋತಾಡಿ,
ಬೇಸಿಗೆಯಲಿ ಬೆವರಿ ಕೈಜಾರುತಿದೆ,
ಚಳಿ-ಮಳೆಗೆ ತಂಪಾಗಿ ಕೈ ಕೊರೆಯುತಿದೆ
ಎಲೈ ಮಾನವ ಸಾಕು ನನಗೆ ಈ ಒಂಟಿ ಬಾಳು
ಬಯಸಿದೆ ನನ್ನ ಮನಸು ಸರಸ – ಸಲ್ಲಾಪ
ಮತ್ತೆ ಉಳಿದೆಲ್ಲ ಹಾಳು ಮೂಳು.....
ಬಿಡುತಿರುವೆ ನೀ ಹೊಡೆದ ಮೊಳೆಯನ್ನು
ಅದೇ ನಾ ಹಿಡಿದ ನಿನ್ನ ಪರೋಕ್ಷ ಕೈಯನ್ನು
ಜಾರಿ ಬಿದ್ದು ನಾನಿನ್ನು
ಒಡೆದುಕೊಂಡು - ಮುರಿದುಕೊಂಡು ಸ್ವಲ್ಪ ಮೂಳೆ ಅಲ್ಲಿ ಇಲ್ಲಿ ಇನ್ನು...
ಸೇರಿ ನಾ ಗುಜರಿಯನ್ನು ಅಂಗಡಿಯನ್ನು
ಸಂಧಿಸಿದರೆ ಸಾಕೆನ್ನಿಸಿದೆ ನನ್ನ ಸಂಬಂಧಿಕರನ್ನು
ತೊಲಗಿಸಲು ಈ ಒಂಟಿ ಬಾಳನ್ನು,
ತೊಲಗಿಸಲು ಈ ಒಂಟಿ ಬಾಳನ್ನು,
ತೊಲಗಿಸಲು ಈ ಒಂಟಿ ಬಾಳನ್ನು.....
