ಆಗಮ – ಆದೇಶ ಲೋಪಮಯ

ನಿನ್ನಾಗಮನ,

ಹುಣ್ಣಿಮೆಯ ಬೆಳದಿಂಗಳಲ್ಲೂ ಮೋಡಗಳಿಲ್ಲದೆ ತುಂತುರು ಸುರಿದಂತಾಯಿತು

ಭುವಿ ಕೆಸರಾಗದೆ ನಿನ್ನ ಹೆಜ್ಜೆ ಮೂಡಿದಂತಾಯಿತು

ಸಾಗರ ದಡದಲ್ಲಿ ತೆರೆ-ತೀರ ನಿಂತು ಹರಟಿದಂತಾಯಿತು

ಸೂರ್ಯ ಪ್ರಕಾಶನಾಗದೆ ಹೂವೇ ಜೇನುಗೂಡಿನಲ್ಲರಳಿದಂತಾಯಿತು

ಜೇನು ಹೂವಿನಲ್ಲಿ ಗೂಡುಕಟ್ಟಿದಂತಾಯಿತು

ಇದ ಕಂಡ ಕಾಮಣ್ಣನಿಗೂ ಮಂಪರು ಬಂದಂತಾಯಿತು 

ನಿನ್ನಾದೇಶಕ್ಕೆ,

ಹುಣ್ಣಿಮೆಯೂ ಕರಗಬೇಕೆ

ಬೆಳದಿಂಗಳ ರಾತ್ರಿಯಲ್ಲೂ ಬಿಸಿಲ ಹಬೆಯಾಡಬೇಕೆ

ಮೂಡಿದ ಹೆಜ್ಜೆ ಪಾದುಕೆಗಳಾಗಬೇಕೆ

ಈಗಿರುವ ತುಂಬು ಸಂಸಾರದಿಂದ ಹೂವುಜೇನು – ಜೇನುಹೂವೆಂಬ ಹೊಸ ಅನ್ವರ್ಥಗಳು ಹುಟ್ಟಬೇಕೆ

ತೆರೆ ತೀರದ ಆಳ, ತೀರ ತೆರೆಯ ಆಳವನ್ನು ಸಂಧಿಸಿ ಅರ್ಥೈಸಬೇಕೆ, ಅರ್ಥೈಸಿ ಮತ್ತೆ ಸಂಧಿಸಬೇಕೆ

ಅಬ್ಬಾ!! ಇನ್ಮುಂದೆ ಶೃಂಗಾರವನ್ನರಸಿ ನಿನ್ನ ಪೂಜೆಯೂ ಆಗಬೇಕೆ ?